Þar sem göturnar eru nafnlausar ...

... er uppáhalds U2-lagið, bæði hjá mér og dóttur minni. Hef hana reyndar grunaða um að vera bara að herma, en allavega ...

Myndbandið við lagið góða birtist á Sirkus áðan. Stúlkubarnið reis upp við dogg á sófanum og kallaði á mömmu sína til að við gætum notið dýrðarinnar saman.

Ég settist á gólfið fyrir neðan sjónvarpið og pírði augun, full eftirvæntingar (gleymdi gleraugunum mínum í Eystri hrepp um helgina). Það fór um mig sæluhrollur og ég bað barnið að hækka aðeins, sem hún gerði glöð í bragði.

Um miðbik myndbandsins heyri ég, þar sem ég sit andaktug í náttsloppnum á gólfinu fyrir neðan sjónvarpið, að það hnussar í barninu:

"Hvað er málið með hárið"?

Ég hélt mér hefði misheyrst svo ég hváði. Hvað var barnið að tala um? Það er ekkert nema fullkomið hár í þessu bandi! Hárið á Bono er fullkomið! Hárið á Bono er ástæðan fyrir því að ... æji ég get ekki sagt það í beinni útsendingu en hárið á Bono er hafið yfir gagnrýni, sama hvenær, sama hvar. End of story. Barnið endurtók setninguna. 

Ég hugsaði mig um í brot úr sekúntu, átti ég að taka kast og lesa yfir henni allan sannleikann um fegurðina sem felst í síðu, svörtu hári á höfði karlmanns? Neibb, hún er bara ellefu ára og hefur ekkert við þær upplýsingar að gera. Ég ákvað að kafa dýpra. Andaði djúpt og spurði sakleysislega: "Hvað áttu við?"

"Æji bara, hárið á honum er eikkað svo asnalegt".

 

Athugasemdir

[Anna Lóa (IP-tala skráð) 24.7.2007 kl. 20:10]

Össssss, dissing da master! Er þetta ekkert uppeldi hjá þér kona  

Hittingur sem fyrst

Kv. A 

[Brettingz (IP-tala skráð) 25.7.2007 kl. 08:05]

Ehem..... ok hún er bara 11 ára en ef þetta gerist aftur þá verður þú að veita henni tiltal því eins og þú segir þá er ekkert að neinu hári í þessu bandi.